Smīklu osorys (turpynõjums 3)

Un ka žālums maņī volda,

Sāstūs kod pi gaļis golda.

Raibys dūmys, raibi ceļi,

Cylvāki tī ir voi veļi,

Tīm kas cīnei vysu rasnu,

Tīm, dīmžāl, as naprosts asmu...

Las Vegasys bīds

32

Azarts munu prõtu drõž,

Biznesmeņu maisā bõž,

Sīva šķeibu aci verās,

Plyki bārni smiļtīs perās.

Vīnrūkainõs kastis vara,

Ir prīkš muna prõta tara,

Kurys dēļ uz vysu gotovs -

Myužam ņirb lai naudys šovs!

Mõtis penseja īt lītā,

Spraugā neistā, peltā, cītā,

Vāļ pa vērsu olgys graši,

Pakaļ honorari daži...

Tymā spraugā satak svīdri,

Spaņim ašņa, dõrgī bīdri!

Kai lai stõjūs, kai lai rymstu,

Kai lai teirai dzeivei dzymstu?

Kotrā styurī aparati -

Las Vegasys tī agregati,

Kas prūt tikai naudu slaukt,

Muļķu zemē nogus maukt.

Vysatļautys prõta spēļis -

Deputatim pylnys mēļis,

Nagryb tautu gaismā vest,

Kultūru põr masom pļest..

Latgalīša speits

33

Nūsmulātu muti ryugušnīku strēbu,

Un jyutu kai valk - valk uz atkareibu,

Maizis kancs īspīsts dreb võrūs pērkstūs,

Tys vyss ir nu sirds – nav laika lai õkstūs...

Maņ õrsts ir aizlīdzs par gūvi pat sapņõt,

Taipat kai nadreikstu mežā īt sēņot,

Navaru captu un traknu bõzt mutī,

Un jyutu, ka spāka maņ byus tai kai utī...

Uz vysu kas zaļš vēmīns maņ īt,

Nav vairs pi ko maņ dvēseli sīt,

Prīkš ko lai as dzeivoju, cilvāki mīlī,

(cerams, ka põrdzimšu krokodīlī...)

Reišu kai cyuka par septeņim māmīm,

Ar atvārtu kņõbi kai dzaguzānim,

Nūsprõgšu jauns nu insulta, vēža,

Un naglõbs ņi Jyurmola, ņi Panevēža.

Pi vysa ir vaineigi bārni un sīva,

Jūs dēļ maņ ir jõdzeivoj tai kai prīkš Dīva,

Un nadreikstu likteni sovu as lemt,

Un nadreikstu salātus õrā as vemt.

Ak, pudelis brõļi, ak, krūga ols,

Voi raudosit jyus, kod maņ atīs gols?

Dīzvoi kas īvārõs tukšumu krāslā,

A krūdzinīks olu gõzs cytā „māslā”...

Kai nūmaiņāt prõtu, lai instinktus dzēst,

Voi klūsterī aizīt, voi dzeju sõkt prēst?

Voi bodõtīs sausā sīvai par speiti,

Un izteirēt mīsu, lai võrdi tūp gleiti?

Leigū šaize

34

Syukoj, mõseņ, jõņa zõļi,

Anašeņis nadabõsi,

Papard’s zīda meklējumūs,

Dīzvoj mīsu pīlobõsi.

Seņ jau māsli vysim gēnūs,

Bārnūs tizlūs, olegofrēnūs,

Kur lai svaigu ašņi rūd?

Kam lai sovu klēpi dūd?

Jõņeiši kai tõrpi meiksti,

Kõlys laisteiti tī deigsti,

Hamburgerūs pylni pērksti,

(dīmžāl kõjstarpī nav seiksti...)

Leigū, mõseņ, leigū! sauc,

Jaunys krõsys sevī jauc!

Meikstõs võrsmys

35

Kod svešu dzeju losu,

Caur os’rom pīri kosu,

Deļ kõ jī dūmoj tukši,

Kai pārno goda rukši?

Kur zemtekstaino jāga?

Kur uguņs, kuru vāga,

Kas dūtu vysim līsmi,

Un ļurbom dzeitu brīsmi?

Jā, meiksti ņyuļa panti,

Vairs mīlõm nasyt kanti,

Un nasauc sābrus sist,

Tik atlīk koktā dzist...

Jā, varūņgēni pyrmī kreit,

A krūpļi bārnus taisēs reit,

Tai tautys ģenētika mērst,

Tik atlīk brõļu kopūs sērst...

Mõkslinīka izvēļe

36

Verūs, dūmoju i nasaprūtu,

Šmakouku jimt mõgā, voi rūkā ūtu,

I sīva aizdūmeigi acīs verās,

Laikam mīļātīs ar mani cerās…

Kaids maņ lobums ir nu itõs mīsys,

Gors olkst tik pēc patīsuma tīsys!

Lobõk ļeišu mežā putnus māļāt,

Nakai svīdrainu bõbu zeidūs vāļāt.

Kas ir tovõs acīs laime?

Bārnu duča pilna saime?

Voi ola kaste draugu pulkā,

I zūbi cērsti „vērša bulkā”?

Munai sirdei teikams mīrs,

Bārnu čalys, rūkā sīrs,

Loba grõmota, voi filma,

I sīveņa... kam võrds ir Vilma.

Namērsteigais mõls

37

Maiga, meiksta mõla pyka,

Breinums – kai maņ rūkõs tyka!

Dūmõju – byus dorbs un nauda,

Izarõdīs tei ir bauda...

Bauda radēt šviļpaunīkus,

Šķeivus, bļūdys, cytus nīkus,

Svečturus un gūdim kreļļis,

Voi mozim bārnim Bārbijļeļļis.

Tai kai Dīvs ir īpyuts dvašu,

Radējs cilvāku un kaču,

Tai i as ar meilu grīžu,

Goldu, kurā pyku svīžu.

Glazēt krõsõs nav vairs mūdī,

Tagad malni trauki būdī,

Spēj tik gumejnīkus pērkt,

Un laiceigi vāļ mõlus mērkt.

Molkys dižen daudz gon aizīt,

Nu bet beigõs – nauda atīt,

Tai ka, dzeivi byusim nanūmērsim,

Jaunūs laikūs vacū svērsim!

Pārķyuņs ola glõzī

38

Mõkūņi jau zemī leist,

Ola glõze rūkā sveist,

Sirds dzīd pārķiuneigys õdys,

Kuņģis brāc pēc šķipsnys sõdys…

Sēžu sātā, bõrzdu kosu,

Radzu sābris brīn pa rosu,

Laikam ola smoku mona,

Nu bet lai jau - vysim gona...

Õda gurķim

39

Gurķi võrgu taisa mīsu?

Bet ļaudis soka – teira līsu,

Turklõt sõrmainums ir ūgā,

Kai gaismys pavasara lūgā.

Pateik jīm kod sylti vēji,

Sauļī ļeitu nas it spēji,

Un pa itū sutu brīst,

Dīmžāl naktīs kvēle dzīst…

Beistās jī tik stykla banku -

Kai saiminīki krīvu tanku,

Tõs prīkš jīm kai kopi skaitõs,

Põrvērš myrūneišūs, maitõs.

Nu bet kū lai cilvāks dora?

Zīmā arī gribīs spora,

Gribīs dzeivis prīkūs kust,

Ar gurķi rūkā laimi just!

Šmakovka bez gurķa naīt,

Mõgā navar jū pat īlīt,

Pretojõs un prosõs õrā -

Gribīs gurķi zūbā kõrā!

Tai ka gurķim svāta vīta,

Bez jūs ik golds ir tukša vīta,

Yudiņs viņ, bet gona garšeigs,

Ād jū pilsātnīgs pat parseigs...

Pādejõs dūmys

40

Kod sirds stõs sistīs raiti,

Un byušu kopā, skaiti,

Kū dūma pādejõ vāļ prõtõs,

Kod õrsts pēc bazneickunga kõtõs?

Kas paliks myužeibā pēc maņa,

Voi kopakmeņs un zvona skaņa?

Voi bārnu pulks un sīva skumja,

Voi kaudze ola trauku dumja?

Voi zūbyns kaidam sprondā sprausts,

Un ordeņs vysu draugu skausts,

Voi dzīsme, kura tautõs īt,

Līk maņ pat kopa tymsā smīt!

Glõbējpavasaŗs

41

Maņ sirds sytās kai trameigs začs,

Un žēļs grīž kryuti kai marta kačs,

Leidz točkai rõpoju caur snīgu knapi dzeivs,

Koč õtrõk nõve pajymtu - tod byušu breivs...

Koč õtrõk zīmys borgums beigtūs,

Koč õtrõk strauteņi uz upem steigtūs,

Koč õtrõk Dinaz’s nūdagtu pavalnym,

Un navaidzātu sistīs vaigim malnim!

Kod pavasarī zemī pederi as dzanu,

Nav laika just pat šmygys tvanu,

Kod apsāts vyss - nu tod īt vaļī,

Kai myusu kõzõs vacā gaļī…

Pīdūd, tāvs...

42

Tāvs-latgalīts syt goldā dyuri:

„Lai krīvītis ņi smokys nava sātā! ”,

Dāls pajem ģitāru un soka syuri:

„Voi labeiba aug teirumā nasātā?”

„Tāvs, 8-ņi procenti boltūs viņ palics,

Izmērsim vysi – laiks nažāloj gudrūs,

Tik muslimi vairojās – Alahs tai salics,

Bet mes te ar gaismu tālojom mūdrūs! ”

„Nu kurīņs Tu zyni, ka nav Tevī slāvu,

Voi pazeisti ašņi gon mõtis, gon tāvu,

Tik õdys krõsa ir kritērijs tautai,

Vīnõtu ilgdzeivis ideju skautai! ”

Dižplāns

43

Pa meilū zemi klusi brīnu,

Un prõtā mezgleņus sev sīnu,

Kur loba sāta - tī maņ dūmys,

Ja okupants - lai krovoj sūmys!

Un īšu as pa ceļu lāns,

Un byus maņ golvā varens plāns,

Kai vuicēt brõļim zõļi ēst,

Bet mõsom lynu sāklys pļēst!

...un byus jīm bārnu dižais ducs,

Bet skauģi kaļss kai sauļī… rupucs.

Pūra ģyustā

44

Verūt durys tāva sātā,

Radzu ķērņi styurī svātā,

Naspākā as krāslā ļimu,

Itai sauļai as par slymu...

As storp zvaigņem doncoju,

Mõkūņ-putru vonskoju,

Nasaprūtu tautu šudiņ:

„Padūt, mīlīs, maņ tū studiņ’! ”

Vysums kotrā gaišā prõtā,

Montrauseigu sābru rõtā,

Kū jī saprūt myužeibā -

Dzeivoi saklā mauceibā!

Atrast saprõteigu byutņi -

Apmāram kai Dīva syutņi,

Vysim prõtā vādars, bõbys...

Nu a jõs... uz vysu slõbys...

Kū te gribēt - pagrymums,

Kultūra kai arhaiskums,

Svešu malu stutējums,

Ļaunu tautu „pautējums”!

Reita preļūdeja

45

„Tymss un našmuks sātā laiks,

Īt nu zemis õrā tvaiks,

Drāgnums styngus kaulus taisa,

Nav glõbiņa nu myglys praisa...”

„Kū tu kunksti - sirds jau stõjās,

Dusmys maņī kaudzem krõjās,

Dzeiva asi, ņikas nasõp -

Nav kõ munys dūmys prasõt! ”

„Kur tu īsi - gultā līcīs,

Tyvõk munom kryutim mīdzīs,

Byus i sylts, i dzeive skaņēs,

Kū vyss põrejīs - gon maņēs...”

Sakņis

46

Sakņis skoloj jaunys straumis,

Ņi jõm prõta, ņi jõm gaumis,

Dūmoj jõs, ka vyss ir atļauts,

Un ka vacs tik ryusai pakļauts...

Kū jõs vītā atness, liks,

Voi tys kaida naideigs triks?

Varbyut gryb jys tautys goru,

Ganēt tai kai vušku boru?

Varbyut naktim naguļ, burās,

Sovu senču sakņēs turās,

Un par šaidim taidim grākim,

Taisēs vysus myus par rāgim?

Varbyut dažu brõļu dēļ,

Vysu saimi myusu peļ?

Varbyut laiks jau aizmērst ļaunu,

Mīlēt vysus – zynõt kaunu!

Voi ta eistu mūšķu nava –

Tyvūs austrumūs jūs „krava”,

Vairojās tei varza glauni,

Mes tik varom apskaust sprauni...

Ņi tīm zemis, ņi tīm mõju,

Kaut voi gūvu kõrnu, võju,

Smiļts un sauļe sylda plešus,

Bārnus nosoj vysus nešus...