Sovā dzerevnē vīns pots
Dzeivaju jou trešys gods,
Nav vairs veikala i počtas,
Toli joīt tān da točkas.
Ustabinai jumtins briuk,
Ratu reizi triuba kiup.
Moskvičš pogulmā vairs nariuc,
Bendzins beidzīs, dzeļži sarius.
piedziedājums(ar skaļu bļāvīnu, tai nū sirds)
Ķeijā, traļļaļļā,
Slava mūsu vaļdeibai!
Tolredzeiga poļitika:
Poši rasni, tauta plyka!
Eliktreibas nav jou godi,
Nūzogti nū stobīm vodi,
Tai pa timsu vīns pots sādu,
Ekanomeju - moz ādu!
Apsūlītī treknī godi
Pazudušs kai mežā strodi.
Sev soku: Donāt, nebēdā,
Esam taču Eiropā!
Agrok mūsu cīmā beja:
Četradesmit saimesteibas,
Divas permas, klubs ar ķinu,
Bibļateks ar tanti Zinu,
Stanceja ar dzelzceļu,
I autabuzs ar lelceļu,
Sokumskūla, četras klases,
Punkts, kur izdūd zirgu pases.
Tādin mūsu cīmā driumi,
Apleik tikai korklu kriumi,
Upie savīsušīs bebri,
Vusur naizbrīnami dzebri.
Taidā vītā dzeivot veļīm,
Koki aug pa slīžu ceļīm,
Permas sakritušas obas,
Vuss tis nav nū dzeives lobas.
Pirms trīssimt godīm Lylīs mārs,
Bij mūsu puses ļaužus ķārs,
Noca naskaitāmi kari
Boda laiki cīši gari,
Kolhozi i Sibireja,
Vusu toutu naiznīdeja,
Beidūt pošu mojas sučkas
Laukus daveda da ručkas.
Kur ni verīs, visur klusi,
Process īt uz vīnu pusi.
Runoj, piec sekretnīm plānīm,
Itai vītā jobūt klānīm.
Cilvaki te troucej dobai,
Politiķu dzeivei lobai.
Topiec svarīgāko līeta,
Panokt lai te tukša vīta.
Piec soceļizma sabrukuma,
Cylvaki ni vusai skuma,
Breša zemnīki ar sparu,
Toutas pacāluma garu,
Zemi ora, groudus sieja,
Courom dīnom svīdrus lieja,
Cikam vīndīn apjādza,
Ka vaļdība jūs apjoja...
Vari strodot tu cik grybi,
Beigos dabūsi tik pigu.
Jo taidi, tantiņ, lykumi,
Ka palīk tikai plykumi.
Kur ni verīs, Saeimā, VIDā,
Vaļdeibā voj mūsu PIDā,
Visur devaļvaceja,
Splašnaja degradaceja.
Dieļ to, ka strodot navā jāgas,
Touta prūm nū cīma bāga,
Uz Bolvīm, Reigu, Viļaku,
Uz Īreju i Angleju.
Ja jou itaidas tos lītas,
Krušok prūm nū posta vietas,
Vusi tādin projam ira,
Beidzamī uz vītas mira.
Skaidrā protā itū radzūt,
Gribīs pazakārtīs beidzūt.
Golvu cilpā bozt nav labi,
Atlīk vīn kai izdzert šņabi.
A pret taidu poļitiku
Jaunatne līk narkotyku.
Ja jou vuss te iet uz postu,
Lobok tod as leimi ostu.
Soka deputac uz maņīm,
Nastaigi ar courīm štanīm,
Roksti Jevra projektu,
Dabius bikšom īlopu.
Vusu godi raksteju,
Da jabatj tū birokrateju!
Kamer vusu saskoņoju,
Desmit opisus apjoju.
Symt latu papeiram i tintei,
(Būtu gona jounai plintei),
Kopā tēreits symti pīci,
Leidz pi projekta tu tīci,
Tikai beigos, švakas zines:
Nav nū ielopa ne mines,
Jevranauda kaut kur klusi,
Reigas pusie pazudusi!
Tikuši pī plotos siles,
Citīm naatstoj ni piles,
Laukūs touta trešos škyras,
Jīm lai palīk vušku spyras.
Golvanīs ar toutas montu
Papyldinot sovu kontu.
Kod te beidzūt soksīs fonti,
Vepri biegs kur pilni konti.
Nav jou tai, ka nātrost dorbu,
Var sūdu mūsas syst ar torbu,
Tikai pācok navāg roudot,
Ka namoksoj par itū noudu!
Jevraukazus var laseit,
Tur kur nīz i nanīz kaseit.
Katram ļouta brīva vale,
Nav nikam gar tevi dale.
Pabrikas ir cīt jotaisa,
Jevropai tos tikai maisa.
Vītējī laj oudzej strausus,
Alusbārā ciloj kausus,
Rousta spieļu automātus,
Štopej īkškā ķimikātus,
Sapērk jevramusorus,
I moksoj bankom procentus.
Kamer lauki izneikst klusi,
Sovodok pa Reigas pusi.
Daži, piržūt smolkā krāslā,
Knapi bīzū moku nāsā.
Jodūmoj ir kai ar boudu
Lobok tieriet toautas noudu.
Broukt kur padebeši zili,
Būviet milzu geismas pili?
Vīndīn bibļatekas Zina
Pībrouc jounā ļimuzinā,
Vaicoj: Donat, tu vīns pots?
Atbildu: jou trešīs gods,
Anele i Zose kopūs,
Citi aizalaidos lapos.
Prīceigi, ka prūjom tyka,
Taida miusu poļitika!
Tī, kas dūmoj, ka as sajucs,
Klabinu kai stobā kaļusts,
Tī lai brouc uz mūsu cīmu,
Padzīvoj te godi vīnu.
Poši palūkoj tū laimi,
Smeļt iudyni ar couru spaini.
Ministri i deputāti,
Vusi laipni aicināti!
piedziedājums(ar skaļu bļāvīnu, tai nū sirds)
Ķeijā, traļļaļļā,
Slava mūsu vaļdeibai!
Tolredzeiga poļitika:
Poši rasni, tauta plyka! |
